Walay suwerte ang Team U.S.A.
CEBU, Philippines – Gihangad ang Team USA nga hari sa basketbol sa kalibotan, apan nanamilit kini uban ang labing pait nga kasaysayan sa World Cup human mapukan sa Serbia, 89-94 niadtong miaging gabii didto sa China.
Sa maong kapildihan, ang U.S wala na'y tsansa sa ikalimang dapit ug ang ikapito nga luna maoy labing taas nila nga matugpahan kon modaog sila sa Poland karong gabii.
Kini ang labing ngil-ad nga performance sa Team USA sa kasaysayan sa World Cup.
Sa duwa batok Serbia, ang US Team gilubong dayon sa first period, 7-32. Nakaapas hinuon sila sa second half.
Apan wala sila kapugong sa kainit ni Utah Jazz guard Bogdan Bogdanovic nga maoy mibida sa Serbia human miposa og 28 puntos.
Nangulo sa Team USA si Harrison Barnes nga mipabuto og 22 puntos, samtang sila si Kemba Walker ug Khris Middleton mitampo'g 18 ug 16 puntos matag usa.
Sa dili maayong kapalaran sa World Cup, daghan sa mga NBA superstars ang nagmahay tungod sa wala nila pagduwa sa US Team.
Kahinumduman, sila si LeBron James, Stephen Curry, James Harden, Anthony Davis ug Kawhi Leonard apil sa original line-up sa Team USA, apan miatras sila tungod sa managlahing mga rason.
Sa iyang bahin, si US Basketball manager Jerry Colangelo miingon nga mobangon ang koponan ilabi na sa Olympics sunod tuig kay moporma sila og kalisangan nga koponan.
- Latest
