PBA season angay pamub-an

CEBU, Philippines – Sa wala pa siya mikanaog sa puwesto isip Gilas Pilipinas head coach niadtong Miyerkules, si  Yeng Guiao mibilin og suhestiyon atol sa iyang pakigtigum sa mga  opisyal sa Samahang Basketbol ng Pilipinas.

Usa sa gipangusgan nga punto ni Guiao mao nga pamub-an sa PBA ang ilang season kon ugaling mangandam na ang national team alang sa mga international tournaments.

Miangkon si Guiao   nga usa sa mga nakaapekto sa training sa national team alang sa World Cup mao ang mga duwa sa PBA ilabi na nga pulos mga PBA cagers iyang mga sakop.

Gawas nga pamub-an ang PBA season, gisugyot usab ni Guiao nga hatagan og higayon ang Gilas nga maka-train sa Europa aron maanad kini sa sistema sa mga European nga maoy midominar karon sa World Cup.