Lowry di sab moduwa sa US Team
CEBU, Philippines — Dili na sab moduwa si Kyle Lowry sa US team nga mopakita'g aksiyon sa FIBA World Cup nga sugdan karong Agosto 31 didto sa China.
Si Lowry sa reigning NBA champion Toronto Raptors maoy labing uwahing bitoon nga miatras sa US team gumikan sa angol niini sa iyang kumagko.
Niadtong Hulyo, gi-operahan ang walang kumagko sa Raptors guard ug nanghinaut siya nga makarekober dayon aron makaduwa sa Team USA nga naglaraw sa ikatulo niining World Cup title.
Apan nasubo si Lowry gumikan kay wala pa siya hingpit nga maalim ug sa pagka karon gidid-an nga moduwa sa iyang mga doktor.
"I was hoping to be cleared and ready for the tournament, but I was not cleared for full basketball activities," suwat pa ni Lowry sa iyang Instagram. "I was hoping to be available in time to help my country in their quest for the gold this upcoming tournament. I love playing for USAB but I have to sit this one out and support the team from home."
Si US coach Gregg Popovich naghuwat pa sab karon sa desisyon ni Boston Celtics guard Marcus Smart, nga wala makaduwa sa ilang exhibition game didto sa Las Vegas niadtong Sabado kay nagsakit ang iyang bagtak.
Ang Team USA moataki sa China nga wala ang pipila niini ka superstars, apil na sila si LeBron James, James Harden, Anthony Davis ug Kawhi Leonard nga nakahukom nga magpokus sa ilang preparasyon sa umaabot nga NBA season inay nga modala sa bandila sa ilang nasud sa prestihiyosong torneyo nga mahitabo kausa lamang sud sa upat ka tuig.
- Latest
