Hayco, Chao Sy maghiusa

CEBU, Philippines — Ang mga lider sa sports sa Dakbayan sa Sugbo nga sila si Edward Hayco ug Lorenzo 'Chao' Sy nagkasinabot nga maghiusa alang sa kaayohan sa mga atleta bisan og unsa pa nga posisyon ang ilang gikuptan ubos sa Cebu City Sports Commission (CCSC).

Sukwahi sa nahaunang mga taho, si Hayco magpabilin nga CCSC chairman, samtang si Chao Sy gitudlo nga vice chairman, usa ka posisyon nga gimugna sa labing unang higayon sukad mahimugso ang sports commission niadtong 1998.

Kining mga kalamboan nalatid sa memorandum 2019-0232 nga giisyu sa buhatan ni Mayor Edgar Labella nga gipirmahan mismo sa mayor niadtong Hulyo 30.

Si Hayco, ang labing taas nga naglingkod isip CSCC chairman, nagkanayon nga magpadayon sila nga magtrabaho isip usa ka hiniusang puwersa alang sa kalamboan sa paugnat sa kusog sa dakbayan

Ginganlan nga CCSC commissioners gikan sa pribadong sektor mao sila si Benedict Sun, Francis Nicholas Voltaire Malilong ug coach Jessica Jawad-Honoridez.

Sa habig sa kagamhananan, ang mga sports commissioners mao sila si Kosenhal Jessica Resch, isip tsirman sa committee on Youth and Sports, Antonio Cuenco, isip tsirman sa committee on Education, Science and Technology, Raymond Garcia, isip trisman sa budget and finance ug Bianito Dagatan sa DepEd.

Si Amilo Lopez maoy gitudlo nga CCSC executive director.

Si Councilor  Dondon Hontiveros wala mahinganli sa memo, apan duna siya'y luna sa commission isip tsirman sa Games and Amusements ug vice chairperson sa Youth and Sports sa konseho.

Atol sa labing una nilang Board meeting kagahapon, sila si Hayco ug Chao Sy wala miisyu og pamahayag sa media.

Hinuon, sa wala pa ang ilang tigum, si Hayco mibutyag nga nagkita na silang daan si Chao Sy aron hisgutan ang pipila ka mga mahinungdanong matang ilabi na  kon unsay angay nilang pagabuhaton alang sa kaayohan sa mga atleta ug ingon man sports program sa dakbayan.