Nets nagpalig-on og samot

Kahadlokan nang daan ang line-up sa Brooklyn Nets gumikan sa paghiabot nilang Kevin Durant, Kyrie Irving ug DeAndre Jordan sa ilang poder.

Apan gipalig-on pa og samot sa Nets ang ilang puwersa pinaagi sa pagkuha ni free agent guard David Nwaba nga maayo kaayo ang labok sa tulo ka tuig niining pagbabad sa liga.

Ang 26-anyos nga si Nwaba mo-average og 6.5 points ug 3.2 rebounds uban sa Cleveland Cavaliers sa miaging season. Sa wala pa nalandig sa Cavs, nakaduwa sab siya uban sa Chicago Bulls ug Los Angeles Lakers.

Ball nagpanikad isip Pelican

Si Lonzo Ball nagpanikad nga moabli og bag-ong panid sa iyang karera isip sakop sa New Orleans Pelicans.

Nalabog si Ball sa Pelicans human gi-trade sa Lakers uban nilang Brandon Ingram, Josh Hart ug pipila ka draft picks hulip ni Anthony Davis.

Sa Pelicans, makauban sa 19-anyos nga si Ball sila si Jrue Holiday, JJ Redicku ug Zion Williamson, ang No. 1 overall pick sa miaging draft.