Sharks nakubit sa Heroes

CEBU, Philippines – Ang Casino Ethyl Alcohol-Cebu Sharks mipakita og dalaygon nga labok, apan nahagba gihapon sila sa mga kamot sa Biñan City Laguna Heroes sud sa overtime, 81-85  sa Maharlika Pilipinas Basketball League (MPBL) Lakan Cup niadtong Miyerkules sa gabii didto sa Pasig Sports Center sa Pasig City.

Nindot unta ang dagan sa duwa sa Sharks sa dugang singko minutos sa aksiyon sa dihang nakalabaw sila sa iskor nga 80-77, apan kalit silang nabaraw human si Kyle Neypes milansang og duha ka sagunson nga tres nga nakapaabante sa Heroes, 83-80 sa hingpit sa nahibilin nga 1:25 sa duwa.

Ang alas nga pointguard sa Laguna nga si Allan Mangahas mipasud sa iyang itsa sa nahibiling sayes segundos aron pagsilyo sa daog sa Heroes.

Si Mangahas mitapos uban ang 24 puntos, 13 ka rebounds ug walo ka assists, si Mark Acosta mitali og 13 puntos, samtang si Neypes mi-iskor og 12 puntos sa Heroes nga miposte sa ikaduha nilang sunod-sunod nga daog human gisugat og duha sab ka sagunson nga pilde.

Si Patrick Cabahug mikolekta og 20 puntos, si Rhaffy Octobre mihipos og 18 puntos ug si William McAloney dunay 17 puntos ug 19 ka rebounds, apan nakawang ang ilang paningkamot kay ang Sharks nahagba ngadto sa 2-2.

Sunod nga sangkaon sa Sharks mao ang Valenzuela SPV TOP Marketplace karong Hulyo 11 didto sa Caloocan Sports Complex.