Pringle hugta'g guwardiya sa Phoenix
CEBU, Philippines – Gimandoan ni Phoenix Fuel Masters coach Louie Alas ang iyang mga batos nga buhaton ang tanan aron mapugngan ang bag-ong star player sa Barangay Ginebra nga si Stanley Pringle.
Ang Ginebra mosuway pagsakmit sa ikatulo nilang sunod-sunod nga daog batok sa Phoenix sa alas-7 sa gabii human sa duwa tali sa NLEX Road Warriors ug Rain or Shine Elasto Painters nga sugdan sa alas-4:30 sa hapon didto sa Smart Araneta Coliseum.
Sa unang duha ka duwa uban sa Ginebra, ang All-Star point guard mipakita dayon sa iyang ka maayong laki dihang siya mi-average og 15.8 points.
Tungod niini, atngan ang usa ka makatuok nga depensa nga giandam sa Phoenix batok ni Pringle.
Ang Phoenix gikahadlokan karon sa liga tungod sa pisikal nila nga duwa ug nakita kini dihang ilang giputol ang winning-streak sa NorthPort Batang Pier niadtong Miyerkules.
Dili lang hinuon si Pringle ang angay nga bantayan sa Phoenix tungod kay anaa pud ang reigning Best Import nga si Justine Brownlee ug LA Tenorio nga pulos mi-average og kapin sa 20 puntos matag duwa.
- Latest
