Romeo kuli maapil sa Gilas Pilipinas

CEBU, Philippines – Bisan pa og nagkinahanglan og masaligang point guard nga adunay kasinatian sa international tournament ang Gilas Pilipinas, wala gihapon mipakita og interes si national team coach Yeng Guiao pagkuha ni Terrence Romeo.

Ang Gilas nangita og bag-ong starting point guard gumikan sa pagretiro na  ni Jayson Castro.

Gawas ni Castro, ang Fil-American sensation  nga si Ray Parks Jr. mibalibad usab nga moduwa sa Gilas.

Hinuon, si Guiao miingon nga hanap nga kuhaon niya pagbalik sa Gilas si Romeo nga katapusang miduwa niadtong miaging tuig diin apil siya sa nabaniog nga rambol tali sa Gilas ug Australia. Si Romeo gisuspenso og tulo ka duwa sa FIBA.

Si Guiao mipasabot nga dili na haom si Romeo sa ilang sistema ilabi na nga ang PBA star usa ka klasi sa player nga epektibo kon anaa niya kanunay ang bola.

"System is anchored on unselfish play and constant ball movement. Romeo is most effective when he has the ball," matud pa ni Guiao sa Spin.ph

Gawas pa niini, lisud nga paduwaon si Romeo uban nila ni RR Pogoy ug Troy Rosario, kinsa gikataho nga gikabangi niya dihang nag-uban pa sila sa TNT KaTropa.