Nagpatay ni Bontuyan mga professional killers-Alaras
CEBU, Philippines – Mga propesyonal ang mga mamumuno nga nagpatay kang Police Captain Delfin Bontuyan kinsa gi-ambush diha sa Pope John Paul Avenue sa Barangay Mabolo ning Dakbayan sa Sugbo, sumala pa sa hepe sa Mabolo Police Station Police Major Dindo Juanito Alaras.
Si Alaras nagkanayon nga professional killers ang mga mamumuno tungod kay wala sila magduha-duha pagpatay kang Bontuyan bisan sayod sila nga “well-trained” kini nga polis.
Matud pa ni Alaras, kadaghanan sa samad ni Bontuyan naa sa likod.
Samtang gidepensahan sab niya ang ilang presinto gikan sa mga pagsaway sa mga netizens nga namasangil nga nagmika sila sa ilang trabaho kay duol ra kaayo ang nahitaboan apan wala gyud sila makaresponde dayon.
Pipila lamang ka metros ang distansya sa crime scene gikan sa Mabolo Police Station ug giingong diha pa gyud miagi sa ilang atubangan ang mga gunmen sa ilang pag-ikyas.
Si Alaras nagkanayon nga nakaresponde gyud ang iyang mga sakop ug duna sab migukod sa mga gunman apan wala gyud sila maapsi kay giingong nagbuwag og direksyon ang duha ka motor sa pag-ikyas, duna padung sa Mandaue City ug duna sab niagi sa Pope John Paul Avenue. (/IBM)(BANAT NEWS)
- Latest
