Tubid, Nabong gisuspenso tulo ka duwa; multa sab og P75,000

CEBU, Philippines – Bug-at nga silot ang gipahamtang ni PBA Commissioner Willie Marcial ngadto nila ni  Ronald Tubid ug Kelly Nabong  sa  San Miguel Beermen.

Kini human napamatud-i nga ang duha nakalapas sa patakaran dihang ilang gisukmag ang usa ka fan nga misulod sa korte atol sa PBA finals. Ang maong fan nagsul-ot og  Spiderman costume.

Gawas sa tulo ka adlaw nga suspensiyon, gipabayad usab sila og P75,000 matag usa.

Si Marcial nagtuo nga nanobra ra ang duha ilabi na si Tubid nga bantang  kaayo sa camera nga misukmag sa ulo ni Paolo Felizarta kinsa niadtong tungora gieskortan sa mga security sa Smart Araneta Coliseum pagawas sa korte.

Nangayo na og despensa ang duha ka players, apan ipadayon ni Marcial ang silot.

Gawas sa duha, gisuspenso usab og duha ka duwa ug multa nga P50,000 matag usa sila si SMB assistant manager Daniel Henares ug Dr. Ramon Ibanez.