Durant dili pa gihapon makaduwa sa game-1 Western Conference finals
CEBU, Philippines – Dili pa gihapon makaduwa ang na-injured nga si Kevin Durant sa Game-1 sa 'best-of-seven' NBA Western Conference finals nga mosikad karong adlawa.
Si Golden State Warriors coach Steve Kerr nagkanayon nga lagmit makapalta pa og pipila ka mga duwa ang ilang superstars sa ilang serye batok sa Portland Trail Blazers.
Si Durant inadlaw nga giobserbaran sa Warriors ug si Kerr mikumpisal ngadto sa mga tigbalita nga wala pa sila masayod kun kanus-a makbalik og duwa ang nayayay nilang All-Star center/forward.
"Everyone needs to slow down a little bit on the Kevin stuff," matud pa ni Kerr human sa ilang praktis kagahapon. "He hasn't even stepped on the floor yet. We've tried to remain somewhat vague because the injury is open-ended in terms of how much time he will need to recover."
Mibutyag si Kerr nga si Durant duna pa'y gibatyag nga sakit sa na-angol niining paa ug gipaubos pa kini sa rehabilitasyon.
"He still has pain," batbat ni Kerr. "So there's time ahead of him on the rehab process."
Si Durant mi-average og league-best nga 34.2 points sa playoffs sa dihang nakahiagum siya og angol sa ikatulong kuwarter atol sa 104-99 nilang kadaogan batok sa Houston Rockets sa Game-5 sa ilang series.
Bisan og wala si Durant, ang Warriors milampos pagtagak sa Rockets sa Game-6 aron pagtikang sa Western Conference finals sa ikalima nga sunod-sunod nga season.
- Latest
