Gasol dili na makaduwa sa East Finals
CEBU, Philippines — Dili na makaduwa pa ang sentro sa Milwaukee Bucks nga si Pau Gasol sa nahibiling bahin sa NBA playoffs human gi-operahan ang nabuak niining walang tiil.
Ang 38-anyos nga si Gasol nga nakadaog og duha ka korona uban sa Los Angeles Lakers niadtong 2008 ug 2009, gioperahan niadtong Biyernes didto sa Green Bay ubos sa superbisyon ni Dr. Robert Anderson, inabagan sa doktor sa Bucks nga si William Raasch.
Gipaabot hinuon nga makarekober dayon si Gasol dungan sa pagsugod sa ilang training camp alang sa sunod nga season.
Si Gasol, usa ka six-time NBA All-Star nga nakaduwa sab sa Chicago Bulls ug San Antonio Spurs, mi-average og 4.2 points, 3.7 rebounds ug 1.9 assists karon nga season.
Samtang ang Bucks miposte sa labing nindot nga 60-22 record sa regular season hinungdan nga nakaangkon og homecourt advantage sa tibuok nga bahin sa playoffs.
Ubos sa pagpangu ni Giannis Antetokounmpo, ang Bucks mitikang na sa Eastern Conference Finals diin ilang sangkaon ang modaog sa serye tali sa Philadelphia 76ers ug Toronto Raptors nga kasamtangang nagtabla sa baraha nga 3-3. Ang Sixers ug ang Raptors magtiwas karong Lunes.
Ang Bucks naglaraw nga makasud sa NBA Finals sa labing unang higayon sukad niadtong 1974. Ilang nadaog ang bugtong nilang titulo sa liga niadtong 1971.
- Latest
