Korona tuyo sa talisay

CEBU, Philippines – Suwayan sa Talisay City Aquastars  paglangkat sa korona, samtang ang Mandaue City Ballers nanghinaut nga makaangkon og laing kinabuhi sa dihang mag-abot na sab sila sa Game-2 sa ilang 'best-of-three' finals series sa 2019 Cebu Governor's Cup Inter-Cities and Municipalities Under 21 Developmental Basketball Tournament karong gabii diha sa Mandaue City Cultural and Sports Complex.

Magtigi ang Talisay ug Mandaue sa alas-8 sa gabii human sa duwa alang sa ikatulong dapit tali sa Minglanilla Archangels ug Balamban Shipbuilders sa alas 6:30 sa gabii.

Ang Talisay ni coach Rey Michael Gurrea nagkinahanglan na lang og usa ka daog aron hingpit nga madepensaan ang ilang trono human sila nakabangon gikan sa pagkalubong og 15 puntos sa second half dayon na ngadto sa pagpukan sa Mandaue, 81-76 sa  Game-1   niadtong Mayo 3. Lahi na hinuon ang estorya ning higayona gumikan kay ang Mandaue ni coach Gary Cortes miabli man sa pultahan sa pagbalik sa eksplosibo nilang big man nga si Kenneth Brillo gikan sa usa ka duwa nga suspensiyon.

Si Brillo seguradong makapadugang og gahum sa opensiba sa Mandaue.

Gawas ni Brillo, ang Mandaue makalaum sab nilang Gabriel Cometa, Archie Buscay, Paul John Gonzaga, Lemuel Gonzaga, Jhun Art Marco ug Michael de los Angeles sa ilang tinguha nga mopuwersa og tagakay nga Game-3.

Samtang ang Talisay magsandig sa usa ka tropa niining talento nga gilangkuban nilang Jay Deiparine, Keaton Taburnal, Kendrick Abarquez, Clark Louis Ruedas, Ronan Briones, Elmer Villabrille, Jhaylord Castro ug Gerald Inigo.

Ang Game-3 kon gikinahanglan, duwaon karong Sabado (Mayo 11) diha sa University of San Carlos (USC)-Main gym.