Talisay, mandaue magtigi na sa Governor's Cup finals

CEBU, Philippines – Gipulbos sa Mandaue City Ballers ang Minglanilla Archangels, 98-64 sa tinagakay nilang semifinals niadtong Miyerkules sa gabii didto sa Mandaue City Cultural and Sports Complex aron pag-angkon og katungod nga maoy mohagit sa defending champion Talisay City Aquastars sa finals sa 2019 Cebu Governor's Cup Inter-Cities and Municipalities Under 21 Developmental Basketball  Tournament.

Sugdan sa Talisay ug Mandaue ang eksplosibo nilang kampiyonato karong alas-7 sa gabii diha sa Talisay City Sports Complex .

Apan ning sayo pa lang daan, ang Mandaue daw sa naigo na og makapabarag nga suntok sa ilang laraw nga palayason sa ilang trono ang Talisay kay si Kenneth Brillo, usa sa labing lig-on nga haligi sa ilang opensa, dili man makaduwa sa krusyal nga Game 1 sa ilang best-of-three series nga naggarantiya og P500,000 nga ganti sa mga mananaog.

Si Brillo, nga maoy nangu sa Mandaue uban ang 20 puntos sa 34 puntos nilang demolisyon sa Minglanilla, magsilbe og awtomatik nga usa ka duwa nga suspensiyon human ma-ejected sa maong duwa. Napitohan siya og technical foul sa oras nga 5:32 sa ikatulong kuwarter sa wala pa ma-thrown-out gumikan sa unsportsmanlike foul sa nahibiling 2:12 sa duwa.

  Kay wala si Brillo, sila si Gabriel Cometa, Archie Buscay, Paul Songahid ug Lemuel Jake Gonzaga kinahanglan nga doblehon ang ilang paningkamot ilabi na kay manulong sila sa teritoryo sa mangtas nilang kontra.

Dili lang kay mao kana ang sagubangon sa Mandaue, ila sab nga banggaon ang usa ka kahadlokang puwersa nga dunay daghang kalibre sa armas sa ilang opensiba.

Mga alas sa Talisay nga lagmit makahatag og labad sa ulo sa Mandaue mao sila si Kendrick Abarquez, Jay Deiparine, Keaton Taburnal, Clark Louis Ruedas, Elmer Villabrille ug Raffy Bacamas.

Sa ilang paglawig sa finals, ang Mandaue ug Talisay parehong dunay dalaygon nga mga estorya nga ikapaambit.

Ang Mandaue gisugat og duha sa sagunson nga pilde, apan mipakita og igong kadasig pinaagi sa pagharos og daog sa sunod nilang 10 ka duwa aron paglukat og tiket sa finals.

Samtang natay-og ang gamhanang Talisay human sila nadisgrasya sa Carcar City Lechoneros, 84-85  sa eliminasyon niadtong Marso 25 nga nakapatuol sa 17 ka sunod-sunod nilang daog nga nagsugod pa niadtong miaging season.

Apan mipakita sa ilang kasingkasing isip kampiyon, bagsik nga namawi ang Talisay pinaagi sa pagkolekta og siyam ka sagunson nga daog aron pagpabuhi sa ilang misyon nga madepensaan ang ilang korona.

Modugang og lamas sa  kulbahinam nga finals mao ang engkuwentro tali sa duha sa labing banggiitan ug utokan nga mga coach sa liga.

Ang Mandaue ubos sa paggiya ni Gary Cortes  nga mapasigarbuhon isip champion player ug champion coach sa University of the Visayas (UV) Green Lancers. 

Sa ikaupat pa lamang niya nga tuig, iya dayon nga gitimon ang Lancers sa talagsaong grandslam title sa Cebu Schools Athletic Foundation, Inc. (CESAFI) gikan niadtong 2016 ngadto sa 2018.

Dili sab hinuon mabitin si Talisay head coach Rey Michael Gurrea nga usa sab ka champion player sa mabulukon niyang panahon uban sa University of San Jose-Recoletos (USJ-R) Jaguars. 

Mihimo siya og kasaysayan human iyang gigiyahan ang Aquastars ngadto sa kampiyonato sa Gov's Cup sa miaging tuig nga wa'y pilde sa 14 ka duwa.