Portmen ug opascor gisubha'g daog sa cabl
CEBU, Philippines – Gipanglubong sa Portmen ug OPASCOR ang ilang tagsa-tagsa ka mga kaatbang pagsugod sa Cebu Aduana Basketball Legend (CABL) tournament niadtong Sabado didto sa CPA gym sa north reclamation area, Dakbayan sa Sugbo.
Ang Portmen mipukan sa Alin Customs Brokerage sa iskor nga 112-95 ug gipilde sab sa OPASCOR ang Robbie sa low-scoring ballgame sa iskor nga 57-42.
Mipakitang gilas dayon si Regie Regidor ug gipangulohan ang Portmen pinaagi sa iyang 23 puntos.
Nakakuha sab siya og igong suporta gikan ni James Jordan nga miamot og 17 puntos, Shun Cal nga mitampo'g 16 puntos ug nilang Al Caburnay ug Inting Bacalla sa ilang 12 ug 10 puntos matag usa.
Lima sab ka magduduwa sa Alin ang miiskor og double figures pinangulohan ni Loreto Castillo nga mihakot og 16 puntos, gisundan ni Ryan Barral nga adunay 15 puntos ug Prim Oporto nga mitikdol og 14 puntos. Samtang sila si Chito Lleve ug Jose Velarde mitimbre'g 13 ug 12 puntos sa pilderong Alin Customs Brokerage.
Sa laing bahin, si Nito Garcia mipabuhagay og 19 puntos aron mangu sa balanseng opensa sa OPASCOR.
Mikawat sab og salida si Jonathan Piape nga miambit og 16 puntos ingon man sila si Loloy Abesia, Jonafer Robredo ug Freddie Gaviola nga pareho sab miiskor og double digits.
Sila lang si Gelbert Guirit, Jemar Caynila ug Marlo Cañal ang naka-double figures sa Robbie. Si Guirit miiskor og 21 puntos, si Caynila dunay 16 puntos ug si Cañal sa iyang 13 puntos.
Ang liga gidumala nilang Janno Boniao, Noel Medalle, Ferdinand Sigue, Sidney Ganapin ug Jun Gayo. Milingkod isip consultant mao si Roy Canillas.
PUNTOS MATAG USA
Unang duwa:
OPASCOR (57) – Garcia 19, Piape 16, Abesia 15, Robredo 11, Gaviola 10, Oswa 8, Soldiarios 8, Pastor 4, Respesia 4, Empleo 4, Martinez 2.
ROBBIE (42) – Guirit 21, Caynila 16, M. Cañal 13, Solis 4, Ceballos 2, Famulagan 2, Cañal 2.
Ikaduhang duwa:
PORTMEN (112) – Regidor 25, Jordan 17, Cal 16, Caburnay 12, Bacalla 10, Villacampa 6, Espina 5, Viador 4, Bejoc 2, Monteño 1.
ALIN (95) – Castillo 16, Barral 15, Oporto 14, Lleve 13, Velarde 12, Deniega 8, Baltonado 6, Gulbin 5, Lambayan 4.
- Latest
