Medellin, Danao, Dumanjug naghari sa ilang distrito

CEBU, Philippines — Sa kulbahinam ug makapaisag balahibong mga aksiyon niadtong Biyernes sa gabii nga gikalingaw og maayo sa mga fans, ang Medellin, Danao City ug Dumanjug nakasugakod sa ilang mga karibal aron dominahon ag tagsa-tagsa nila ka mga distrito sa 2019 Cebu Governor's Cup Inter-Cities and Municipalities Under 21 Developmental Basketball Tournament.

Didto sa Medellin Sports Complex, amihanang bahin sa Sugbo,     ang   host Medellin wala lamang manginahanglan sa   abiba sa ilang mga dumadapig, apan hasta dugang singko minutos sa aksiyon sa wala pa nila pildiha ang Tabuelan, 80-78 aron sakmiton ang titulo sa 4th District.

Sikit kaayo ang kumbati sa duha ka protagonista gikan sa sinugdanan hangtod pagkahuman sa regulasyon nga misangpot ngadto sa 71-71 nga panagtabla hinungdan sa overtime.

Sa lugway nga oras, nagpadayon ang hugot nga kumbati sa duha ka koponan, apan  ang Medellin maoy mipatigbabaw aron  madepensaan ang ilang teritoryo bitbit ang makutas nga dos puntos nga daog luyo sa pakigbisog nilang Fritz Saladaga, Luthek Gabriel Leonard ug Gelmart Umpad.

Didto sa Sogod municipal gym, wala igsapayan sa Danao nga moduwa sa balwarte sa ilang kontra bisan og sila mao ang dunay homecourt advantage.

Ang Danao unta maoy mo-host sa Sogod kay mas nindot man sila og rekord sa eliminasyon, apan napugos sila pagbiyahe sa tugkaran sa ilang kontra kay wala pa may gym nga kagamitan sa ilang lugar sa kasamtangan.

Nagbunga hinuon ang kaisog sa Danao gumikan kay nakalingkawas man sila sa mapit-os nga dalan aron pakgangon ang Sogod, 82-78 ug ingon man birahon ang korona sa 5th District. Sila si Ace Rondina ug Vincent Carl Molina maoy nangu sa Danao uban ang 15 puntos matag usa. Si Justin Mondares, bitoon sa UC nga nakampiyon sa miaging CESAFI juniors basketball season, miamot og 12 puntos.

Didto sa Alegria municipal gym sa habagatang Sugbo, ang Dumanjug mipahimus sa maanindot nilang teamwork aron tumbahon ang Alegria, 90-87 ug angkunon ang kampiyonato sa 7th District.

Si Clester Jun Quiñanola mikadlit og 17 puntos, samtang sila si Jade Cañete, John Michael Casag ug Janrell Degollacion nagkumboya og 38 puntos alang sa Dumanjug.

Samtang nagmaya ang Medellin, Danao ug Dumanjug kay garantisado na og P100,000 matag usa, wa'y angay nga kabalak-an ang Tabuelan, Sogod ug Alegria kay gawas nga nakabulsa og P50,000, segurado na man silang tanan og luna sa quarterfinals.