Libreng sports clinic sa Talisay gidumog
CEBU, Philippines — Gidagsa sa mga ginikanan ug kabataan ang buhatan sa Talisay City Sports Commissioner aron magpalista alang sa libreng sports clinic.
Una kining higayon nga ang sports commission sa Dakbayan sa Talisay mohatag og libreng sports clinic.
Si Jenneath Villagonzalo, executive director sa SportsCom mibutyag nga dugay na nilang gibuhat ang sports clinic matag summer.
Apan karon lang nila nahatag nga libre gumikan sa hangyo sa miyembro sa ilang grupo.
Kaniadto, ang mga bata nga magpa-enrol sa bisan unsa nga event mobayad ngadto nila, apan ang ilang gibayad madawat ra sab nila kini kay sila man sa SportsCom ang mopalit sa ilang gikinahanglan nga sports equipment.
Karon nga libre namenosan ang trabaho nila ni Villagonzalo gumikan kay ang mga ginikanan na man mismo ang mohatag sa sports equipment sa ilang mga bata. Ang siyudad mipapili sa mga kabataan og 18 ka mga sports.
Matud pa ni Villagonzalo nga sa unang adlaw pa lang nahurot na ang slot sa swimming ug basketball. Dugang pa ni Villagonzalo nga 'first come first serve' basis ang ilang gipatuman nga palisiya aron nga walay mahay. Bukas pa gihapon ang ilang opisina nga modawat sa gustong magparehistro.
- Latest
