Madridejos wa gihapoy pilde sa Gov's Cup
CEBU, Philippines — Sa miaging duha ka tuig, sa kanunay sila nangiwit.
Apan karon ang mga Lawisanon sa Madridejos, isla sa Bantayan Island maoy nanghawod sa liderato ug mapasigarbohon isip usa sa duha lamang ka teams nga wa pay pilde sa 4th District cluster sa 2019 Cebu Governor's Cup Inter-Cities and Municipalities Under 21 Developmental Basketball Tournament.
Nadasig sa mainit nga abiba sa ilang mga katagilungsod niadtong Sabado sa gabii didto sa Madridejos Sports and Cultural Center, ang Team Madridejos ni coach Renato "Molong" Rosales milampasop sa Tabogon, 102-90, aron angkonon ang solong liderato sa 4th District bitbit ang 3-0 record.,
"Teamwork kaayo ta. Dedicated sad kaayo atoang mga players ug bisan sa praktis pa lang makita na nato ang ilang determinayon," matud pa ni Madridejos team coordinator Owen Daruca.
Samtang sa pagsulat ning taho kagabii, ang Madridejos nakigsangka pa batok sa silingan niining Santa Fe. Kon modaog, hayan nga segurado nang makabira og luna sa quarterfinals ang Madridejos ug ingon man P50,000 nga bonus sa sunod nga hugna.
Sa ubang duwa sa 4th District, ang San Remigio mipakaging sa Sante Fe, 81-77, sa bugno tali sa mga way daog nga koponan, samtang ang Bogo City mipayaka sa Tabuelan, 78-68, alang sa ikaduha nilang daog sa tulo ka duwa.
Ang San Remigio moputol sa tulo ka sagunson nilang malas, samtang ang Santa Fe bokya gihapon sa upat ka duwa. Ang Bogo ug Tabogon nagtabla karon sa baraha nga 2-1.
Sa aksiyon sa 1st District didto sa Carcar Sports Complex, ang Naga City Electrifiers mibugha sa San Fernando Spartans, 73-67, samtang gitiwasan sa Carcar Lechoneros ang kalbaryo sa Sibonga Pillars, 78-61.
Ang Naga duna nay 3-1 record, ang Carcar ug San Fernando nagtabla sa baraha nga 2-2, samtang ang Sibonga wa pay daog sa upat ka duwa.
Didto sa Tuburan municipal gym, ang Tuburan mikuha sa solong liderato sa 3rd District bitbit ang 3-1 nga marka human gilampaso ang Barili, 106-75.
Sa 2nd District, ang Santander nakaipsot sa Boljoon, 70-68, aron putlon ang tulo ka sagunson nilang pilde, samtang ang Samboan milampornas sa Alcoy, 93-79, aron sa padayon niining paghari sa liderato uban ang 4-1 record.
- Latest
