Ruiz, Olmilla Adunay managlahing misyon

CEBU, Philippines – Si two-time defending women's champion Lucille Ruiz sa Keith De Fiebre Cycling Team naglaraw og makasaysayanong 3-peat, samtang si Joland Olmilla sa Team Tri SND Barracuda tinguha nga makuha og balik ang iyang korona sa men's division sa Consolacion Mountain Bike Duathlon 3.0 karong Marso 3 didto sa SM City-Consolacion.

Gipakyaw og daog ni Ruiz ang nag-unang duha ka edisyon ug karon nagtinguha siya nga mamahimong labing unang grandslam queen ning makutas nga lumba nga pagasugdan sa usa ka five-kilometer run dayon 20km bike ug motapos sa laing 3km run. 

Lisud hinuon ang tahas ang sagubangon ni Ruiz gumikan kay ubay-ubay man sab ang lig-on niyang mga kontra, apil na ang polis nga si Marivic Aliser, nga bag-o lang nakadaog sa usa ka 50km ultra race, ug ingon man ang nurse nga si Hannah Bun.

Sa kumbati sa men's elite, ang 25-anyos nga si Olmilla mobalik sa aksiyon sa tuyo nga kuhaon og balik ang  dungot nga iyang nakab-ot niadtong 2017.

Bug-at hinuon nga misyon  ni Olmilla kay dekalibre man nga mga karibal ang iyang banggaon sama nila ni Joseph Miller sa MotorAce, ang bugtong Pinoy nga Xterra pro triathlete,   Metchel Pilapil sa Pilapz Boys ug Sulpicio Ombay sa Team Kombati.

Sa laing bahin, ang mga organizers gikan sa Metafit Tri Team nga gipangulohan sa ilang founder nga si Alan G. Choachuy mipahibawo atol sa usa ka press conference kagahapon sa Ramen Dojo diha sa Cebu IT Park nga 30 na lang sa gitagana nilang 300 ka slots ang nahibilin.

Kadtong gusto moapil sa karera nga gipaluyohan sa YKK Bikes, Cycle Logic, Missing Link Cycling, Altra shoes, Visual Sense Cataract Center,  SM City-Consolacion ug Consolacion LGU ubos sa liderato ni Teresa 'Nene' P. Alegado gihatagan kutob na lang karong Pebrero 16 aron magparehistro.

Ang entry fee nagkantidad og P1,450 sa individual category ug P2,900 sa relay.

Mahimong magparehistro sa YKK Bikes (0915-7645359), Missing Link Cycling sa Robinsons Galleria Cebu (0932-1093633), Cycle Logic-Parkmall (0933-4821855), o sa ALDO/Onitsuka Servitech Northroad Paknaan/Tabok branches (032-4204154).