WBO mimando sa Nietes-Palicte rematch
CEBU, Philippines – Ang World Boxing Organization mimando nga sugdan na ang negosasyon kalabot sa "rematch" nilang WBO super flyweight champion Donnie 'Ahas' Nietes ug sa mandatory challenger niining si 'Mighty' Aston Palicte nga iya ra sab nga kababayan.
Gikontak na sa WBO ang promoter ni Nietes nga mao ang ALA Promotions ug ni Palicte sa Roy Jones Jr. (RJJ) Boxing Promotions aron pahibaw-on sila nga dunay sila'y 15 ka adlaw aron sabotan ang Nietes vs. Palicte II.
Kun walay kasabotan nga makab-ot ang duha ka kampo sa gitakda nga deadline karong Pebrero 19, ang WBO momando og purse bid. Ang labing menos nga bid nagkantidad og $100,000. Ang modaog sa bidding maoy maka-angkon og katungod nga mo-promote sa "rematch".
Sila si Nietes ug Palicte nagsangka sa unang higayon alang sa bakanteng WBO super flyweight title niadtong Septiyembre sa miaging tuig, apan miresulta kini ngadto sa 'controversial draw'.
Nasagmuyo si Nietes sa desisyon sa pagtuo nga klaro kaayong siya maoy daog sa away.
Mao kini ang hinungdan nganong si Nietes dili na interesado nga makig-'rematch' ni Palicte.
Apan karon nga duna na'y mando gikan sa WBO, lagmit si Nietes mapugos sa pakigharong og usab ni Palicte.
Si Nietes (42-1-5, 23KOs) misakmit sa WBO title human gipukan ang Hapon nga si Kazuito Ioka pinaagi sa desisyon niadtong bisperas sa Bag-ong Tuig aron mamahimong usa ka four-division world champion, samtang si Palicte (25-2-1, 21KOs) nakaangkon og katungod nga mohagit og balik ni Nietes human niya pildiha si Jose Martinez sa ilang WBO elimination bout sa miaging semana.
- Latest
