Warriors mitipi sa Spurs

CEBU, Philippines – Mipaarak og 23 puntos si Kevin Durant aron mangulo sa opensiba sa Golden State Warriors nga  walay kaluoy milubong sa San Antonio Spurs, 141-102 sa NBA kagahapon didto sa Oracle Arena sa Oakland, California.

Ang two-time defending champions wala mihatag og kahigayonan sa ilang karibal sa Western Conference nga makaporma ug mipauwan kini og 3-point shots ilabi na sa third period diin mipasud sila og lima sa pito nila ka tira.

Si Klay Thompson miambit og 26 puntos, samtang Stephen Curry miamot  og 19 puntos  alang sa Warriors nga  nag-una na sab karon sa   West sa ilang 38-15 win-loss record.

Sama sa Warriors, ang Milwaukee Bucks mipalig-on usab sa ilang kupot sa No. 1 sa Easteren Conference dihang ilang gisungag ang Washington Wizards, 148-129 didto sa Bradley Center.

Ang All-Star nga si Giannis Antetokounmpo mikamada og 43 puntos aron mangulo sa scoring sa Bucks nga midaro sa ikalima nilang sunod-sunod nga daog.  Ang Bucks nagtangag na og 40-13 nga baraha.

Didto sa Chicago, ang bisitang New Orleans Pelicans mikulit sab og daog dihang ilang gitumba ang Bulls sa iskor nga 125-120.

Kini bisan pa og wala na moduwa kanila ang All-Star nga si Anthony Davis sukad nga kini mipadayag nga gusto na mohawa sa koponan.

Sa uban pang mga resulta, ang Dallas Mavericks mipukan sa Charlotte Hornets, 99-93, ang Brooklyn Nets midaog sa Denver Nuggets, 135-130, gilubong sa Houston Rockets ang Sacramento Kings, 127-101,  ug gilubong sab sa Utah Jazz ang Phoenix Suns sa iskor nga 116-88.