CIE Lions hari sa under 18 division sa PSDL basketball tournament
CEBU, Philippines — Ang Centre for International Education (CIE) Lions mitak-op sa impresibo nilang ratsada pinaagi sa pagkulit og 71-64 nga daog batok sa Divine Life Institute of Cebu (DLIC) sa tagakay nilang kampiyonato aron pagsakmit sa titulo sa Under 18 division sa Private Schools Developmental League (PSDL) Basketball Tournament didto sa PAREF-Spingdale gym sa Barangay Lahug, Dakbayan sa Sugbo.
Si Vince Ryan Tecson mitagak og 20 puntos, sila si Ralph Seno ug Jake Gorre nagkumboya og 25 puntos ug si Chris Balabat mitampo og 10 puntos alang sa Lions nga milangkat sa korona nga walay pilde.
Sikit kaayo ang kumbati sa duha ka koponan gikan sa pagsugod, apan taliwala sa nindot nga labok sa DLIC ni coach Edsel Vallena, nakasikit ang Lions tungod ni Seno nga mikadlit sa tanan niyang 13 puntos sa ikaduha ug ikatulong kuwarter.
Alkansi gihapon og usa ka lugas, 46-47, sila si Tecson ug Gorre nagmangtas pinaagi sa pagtigum og 15 puntos sa 25-17 endgame rally sa Lions nga maoy nakapatikangkang sa DLIC.
Si Nino Vin Clark Jugan maoy nangu sa DLIC uban ang 16 puntos, samtang sila si James Al Lim, Godfrey Sabanal ug John Paul Boyles nagkumbinar og 35 puntos sa pilderong kawsa.
Ang CIE Lions gitimon ni coach Al Solis, kanhi PBA player nga nailhan sa hait niyang outside shooting. Miabag kaniya sila Kevin Quilantang, nga kanhi nakauban ni PBA superstar ug five-time MVP JuneMar Fajardo sa dihang nagduwa pa sila sa kolehiyo sul-ot ang uniporme sa University of Cebu (UC) Webmasters, ug Ray Piczon.
Nahimong posible ang partisipasyon sa CIE sa PSDL gumikan sa hugtanong suporta sa ilang Parents-Teachers Association (PTA) ubos sa liderato ni Cris Co ug ingon man sa tag-iya sa ilang tunghaan nga si Nelia Sarcol.
PUNTOS MATAG USA
CIE (71) – Tecson 20, Seno 13, Gorre 12, Balabat 10, Gica 8, Aureo 8.
DLIC (64) - Jugan 16, Lim 13, Sabanal 12, Boyles 10, Mantuhac 6, Rombaiz 5, Dayday 2.
- Latest
