20th BTA Sinulog Open gisugdan
CEBU, Philippines – Kapin sa 100 ka bowlers ang nisalmot sa 20th BTA Sinulog Open National Tournament nga gibuksan niadtong Lunes sa Gaisano Bowlingplex sa Banilad, Dakbayan sa Sugbo.
Ang usa ka semana nga torneyo gibahin sa upat ka kategoriya -- mixed open, mixed classified, mixed seniors ug mixed youth.
Ubos sa pagtugot sa Philippine Bowling Federation (PBF), ang maong torneyo nga gipasiugdahan sa Bowling Tenpin Association (BTA-Cebu) gilauman nga apilan sa dili momenos 24 ka mga national team players.
"We are expecting about 140 players coming over from all over the country and about 24 of which are national team players," matud pa ni BTA-Cebu president Bel Suelto Jr.
Ganting salapi ang madawat sa mga mananaog diin ang mokampiyon sa mixed open mobulsa og P70,000, samtang P35,000 ug P17,500 ang madawat sa mopahiluna sa ikaduha ug ikatulo.
Ang top three sa mixed classified makadawat og P60,000, P30,000 ug P15,000 matag usa, samtang ang mga sa mixed seniors makaangkon og P60,000, P30,000 ug P15,000.
Makadawat sab og ganting salapi ang mopahiluna gikan sa ikaupat hangtod sa ikawalo nga dapit sa matag kategoriya.
Ang top three sa youth division makaangkon og P20,000, P10,000 ug P5,000 matag usa.
- Latest
