Cebu City Sharks mihatag og update sa ilang team sa MPBL
CEBU, Philippines – Ang Cebu City Sharks-Casino Ethyl Alcohol, ang home team sa Sugbo sa Maharlika Pilipinas Basketball League nga gitukod ni Manny Pacquiao, mihatag og pipila ka mga updates kabahin sa status sa ilang team sa nagpadayong MPBL Datu Cup.
Sa ilang opisyal nga Facebook page, ang International Pharmaceuticals, Inc. (IPI) management nga maoy nagdala sa Sharks mipahibawo nga ilang gibuhian ang lima nila ka players nga sila si John Abad, Franz Arong, Jovanie Luz, Garex Puerto ug Iron Suano.
Wala na sab kanila si shooting forward Cesar Catli gumikan kay milarga kini sa Amerika human sa ilang duwa batok sa Rizal Crusaders didto sa Makati City niatong Nobiyembre.
Aron tapakan ang haw-an, ang Sharks mikuha nilang Jaybie Mantilla ug RJ Dinolan, kanhi mga bitoon sa dihang nagduwa pa uban sa University of San Jose-Recoletos (USJ-R) Jaguars sa Cebu Schools Athletic Foundation, Inc. (CESAFI).
Mihatag sab og katin-awan ang Sharks sa estado nilang Edrian Lao, Dinolan, William MacAloney ug Victor Nuñez human sila gi-draft sa mga liga nga gusto nilang duwaan.
Si Lao gikuha sa Northport Batang Pier sa miaging PBA Draft niadtong Disembre, apan padayon kining moduwa sa Sharks hangtod nga dili pa kini makapirma og kontrata sa bag-o niyang team.
Sa iyang bahin, si Dinolan gipili sa Trinity College, samtang sila si McAloney ug Nuñez gibira sa Che'Lu Bar and Grill sa PBA D-League Draft niadtong Martes.
Matud pa sa Sharks, nga sila si Dinolan, McAloney ug Nuñez padayon nga moduwa kanila bisan og magsugod na ang D-League ug mangita silang daan og paagi aron dili mapaapektohan ang ilang iskedyul sa pagduwa nila sa MPBL ug ingon man sa D-League.
- Latest
