Parker nagmadaugon pagbalik sa San Antonio
CEBU, Philippines — Ang emosyonal nga pagbalik ni Charlotte point guard Tony Parker sa San Antonio kagahapon natapos sa 108-93 nga kadaogan sa Hornets.
Apan bisan pa man og pildero, gipakpakan ug gihatagan og standing ovation si Parker sa Spurs fans nga mikonsiderar kaniya nga ila gihapon kauban ug idolo.
Si Parker, lumad gikan sa France, nakadaog og upat ka kampiyonato sa NBA sud sa 17 niini ka seasons sa San Antonio ug kabahin sa gikaintapang "Big 3" sa Spurs uban nilang Tim Duncan ug Manu Ginobili.
Si Spurs coach Gregg Popovich nga nakatanom og lawom nga panaghigala uban sa player nga miabot sa ilang poder sa dihang usa pa kini ka bayongbayong, miangkon nga nabag-ohan siyang nagtaw-an ni Parker nga nagsul-ot og laing uniporme.
"It pulls at the heartstrings a little bit, but the situation is great for him," matud pa ni Popovich. "He's landed in a good place and he's having a good season and he's happy. So as long as he's happy, I'm happy."
Susama sab ang gibati sa mga panatiko sa Spurs.
Sukwahi ni Kawhi Leonard nga ilang gisuliyawan ug gibansagan nga traydor, ilang gidawat si Parker sa tumang kahinangop sa pagtaak niini og balik sa teritoryo sa Spurs.
Butang kini nga gikalipay og maayo ni Parker, ang 2007 NBA Finals Most Valuable Player.
Si Parker mitapos uban ang otso puntos, upat ka assists ug tulo ka rebounds, apan si Kemba Walker maoy nangu sa Hornets bitbit ang 33 puntos, si Jeremy Lamb miamot og 19 puntos.
- Latest
