Villafranca misalbar sa cebu city Sharks
CEBU, Philippines — Ang Cebu City Sharks mikolapso sa katapusang kuwarter, apan gisalbar sa follow-up shot ni Kevin Villafranca nga maoy nag-aswat kanila ngadto sa 69-68 nga kadaogan batok sa Pampanga Lanterns sa Maharlika Pilipinas Basketball League (MPBL) Datu Cup niadtong Sabado sa gabii didto sa Angeles University Foundation Sports and Cultural Center sa Angeles City, Pampanga.
Human naglabaw og 11 puntos, 58-47 sa nahibilin nga 9:18 sa aksiyon, kalit lang nga misukarap ang Sharks hinungdan nga naalkansi na hinuon kini og usa ka lugas, 67-68 sa katapusang 21.7 segundos sa duwa.
Apan sa kalit lang nasupla ang kalipay sa Lanterns gumikan kay si Villafranca mipasud sa iyang put-back gikan sa sipyat ni Victor Nuñez sa nahibilin nga 2.4 segundos aron palangoyon ang Sharks sa dagat sa himaya.
Duna pa unta'y tsansa ang Lanterns nga kawaton ang daog, apan nasipyat si Jimbo Aquino sa iyang tira nga tres.
Si Patrick Cabahug mibahog og 20 puntos, duha ka rebounds ug tulo ka assists alang sa Sharks nga nagtabla na karon ug ang Laguna sa ikapitong puwesto sa Southern Division bitbit ang 9-11 records.
Solido sab kaayo ang duwa ni William McAloney sa Sharks uban ang 13 puntos ug 13 sab ka rebounds.
Si Michael Juico dunay 22 puntos ug walo ka rebounds alang sa Lanterns nga natagak ngadto sa 7-12. (BANAT NEWS)
- Latest
