UV Centennial Run 3 thousand ka runners target sa organizers

CEBU, Philippines — Ang mga organizers nag-target og 3,000 ka runners nga mosalmot sa University of the Visayas (UV) Centennial Run karong Sabado.

Ang petsa sa lumba, Enero 12, natumong sa ika-131 nga anibersaryo sa adlaw’ng natawhan ni Don Vicente Gullas, ang founder ug labing unang presidente sa UV. Gi-establisar ni Don Vicente ang UV isip Visayan Institute niadtong tuig 1919.

Si UV Athletic Director Chris Mejarito nagkanayon nga sa pagka-gahapon, miabot na ngadto sa 2,500 ang nagparehistro sa ilang kalihukan nga maoy mosikad sa usa ka tuig nga UV Centennial celebration ubos sa tema nga “UV: A Century of Love and Service to Humanity”.

Masaligon si Mejarito nga ilang makab-ot ang ilang tumong gumikan kay ang rehistrasyon magpadayon pa man hangtud karong adlawa.

"We have some alumni from the United States who will be coming over to join our fun run. We also have some Indian medicine students as well as students from our satellite campuses. We are very thankful and appreciative of their support," matud pa ni Mejarito.

Ang CESAFI grandslam champion UV Green Lancers ubos sa pagpangu sa ilang team manager nga si Samsam Gullas ug coach Gary Cortes modagan sab agig suporta sa tinamod nilang tunghan.

Mga distansiya nga kumbatihan mao ang 3K, 5K, ug 10K.

Ang makita sa maong karera alang sa mahinungdanong kawsa ipundo sa nagkadaiyang program sa UV sa adopted niining barangay nga mao ang Barangay Kamagayan.

Gawas sa mga medalya ug certificates, kapin sa P70,000 nga ganting salapi ang iapud-apud ngadto sa mga mananaog sa nagkadaiyang kategoriya.

Ang rehistrasyon nagkantidad og P250 sa 3K, P350 sa 5K, ug P450 sa 10K apil na ang singlet, race bib, refreshments ug        freebies.

Alang sa dugang impormasyon, mahimong mokontak sa 253-6173 o bisitaa ang UV P.E. office.