Dejacto bag-ong presidente sa Power Forty Ballclub

CEBU, Philippines — Bag-ong Tuig, bag-o sab nga opisyales ang molingkod sa Power Forty Ballclub sa 2019-2020.

Ang pagbag-o sa hut-ong sa mga opisyal sa Power Forty nahitabo atol sa tinuig  nilang Christmas Party  nga gitambongan sa tanang miyembro kagahapon  didto sa Inayawan Sports Complex, Cebu City.

Ang chief of referees  sa Cebu Schools Athletic  Foundation, Inc. (CESAFI) nga si Edwin Dejacto Sr., mao ang bag-ong napili nga presidente.

Si Dejacto molingkod sa  una niyang termino sa pangatungdanan   hangtod sa 2020.

Gawas ni Dejacto, lain pang opisyales nga napili mao sila si Dome Labalan (vice president),  Alex Sandal (secretary), Vez Eleguin (treasurer), Hermes Abasolo (auditor), Gil Magallon (PRO), Tata Pestaño ug Cesar Gaviola (sgt. at arms).

Ang board of directors naglakip nila ni Atty. Flor Yosores, Bob Samson, Chino Kalinga, Mark Lisondra, Romy Rama ug Tony Navares.

Plano ni Dejacto nga mopahigayon sa una niyang liga karong Abril.  Pagatawgon kini og "Power Forty President's Cup 2019".

Gihangyo ni Dejacto  ang tanang miyembro sa pag-apil sa praktis sa matag adlaw'ng Martes gikan sa alas-6 sa gabii hangtod sa alas-10 sa gabii ug Sabado sa alas-6 sa buntag hangtod sa alas-9 sa buntag diha sa Inayawan Sports Complex aron maapil sa drafting alang sa umaabot nga liga.

Ang dili mopraktis dili makaapil sa liga gawas lang kon adunay balidong rason.