Dobleng kalbaryo

CEBU, Philippines — Dobleng kalbaryo ang nahiaguman sa Houston Rockets gumikan kay gawas nga gipilde sila sa Miami Heat, 101-99 nga nakabugto sa lima ka sagunson nilang daog sa NBA kagahapon didto sa American Airlines Arena sa Miami, Florida, na-injured pa gyud ang alas nilang pointguard nga si Chris Paul.

Ang Rockets nga lab-as pang mihaw-as gikan sa 18 puntos nga kadaogan batok sa Washington Wizards diin sila mikulit og rekord sa labing daghan nga 3-pointers nga napasud sa usa ka duwa nga miabot og 26, naglabaw sa iskor nga 45-37 sa ikaduhang kuwarter sa dihang na-injured ang walang paa  ni Paul. Migawas siya sa duwa ug wala na mobalik pa.

Gipahibalo sa Rockets nga si Paul dunay left hamstring strain ug gitakda nga mopaubos sa dugang eksaminasyon karong adlawa aron pagsuta sa iyang kondisyon.

Ang ilang kapildihan ug injury ni Paul daw sa duha ka sagunson nga suntok nga miigo sa Rockets kay nagsugod na unta sila og arangkada gikan sa nagkagidlay nilang sinugdanan.

Human sa lima ka sunod-sunod nga daog, misaka sila gikan sa ika-14 ngadto sa ikapitong puwesto sa Western Conference sud sa usa ka semana, apan ang pagkaangol ni Paul tataw nga dakong piang sa ilang kampanya.

Si Josh Richardson maoy nangu sa Heat uban ang 22 puntos.

Samtang si James Harden mibahog og 35 puntos, 12 ka assists ug unom ka rebounds sa Rockets nga katapusang naglabaw sa iskor nga 90-89

Human nalabyan sa Heat, duna pa unta'y tsansa ang Rockets nga dag-on ang duwa, apan nasipyat si Eric Gordon sa iyang tres dayong kapupos sa oras.