Rockets mikulit og record

CEBU, Philippines — Dobleng pagmaya ang natagamtaman sa Houston Rockets human sa 136-118 nilang kadaogan batok sa Washington Wizards sa ilang duwa sa NBA kagahapon didto sa Toyota Center sa Houston, Texas.

Kini gumikan kay ang Rockets mikulit sab og rekord sa labing daghan nga 3-pointers sa usa ka duwa sa kasaysayan sa liga human sila miposa og 26 ka tres.

Ilang gibuak ang karaang marka nga 25 ka tres nga gipauwan sa Clevelang Cavaliers batok sa Atlanta Hawks niadtong Marso 2017.

Si reigning MVP James Harden dunay unom ka tres sa iyang 35 puntos. Si Chris Paul milansang og lima ka tres, samtang sila si Gerald Green ug Eric Gordon nakaigo og upat ka tres matag usa alang sa Rockets nga mirehistro sa ikalima nilang sagunson nga daog.

"We're just playing better," matud pa ni Rockets coach Mike D'Antoni.

Didto sa Salt Lake City, ang Golden State Warriors napukan ngadto sa Utah Jazz, 103-108.

Gibasol ni Golden State coach Steve Kerr   ang kakulang og enerhiya nga mao karon ang problema sa Warriors.

Si Stephen Curry mibugha og 32 puntos, apan mibahar ang mga tirada sa kinatibuk-ang puwersa sa Warriors nga miabot lamang 40 porsiyento.

Mitapos man tuod si Kevin Durant og 30 puntos, apan unom lamang sa 18 niya ka itsa ang iyang napasud sa nag-unang tulo ka kuwarter. Utro sab si Klay Thompson nga mi-iskor lamang og 12 human masipyat og  ka siyam sa 12 niya ka tira.

Didto sa Toronto, si Fred VanVleet milansang sa krusyal niyang tres sa nahibilin nga 26.4 segundos aron aswaton ang Raptors ngadto sa kulbahinam nga  daog batok sa Indiana Pacers, 99-96.

Si Kawhi Leonard mipabuhagay og 28 puntos ug si Pascal Siakam midugang og 17 puntos alang sa Raptors nga nakabangon human malubong og 17 puntos aron paglikay nga masagunsonan og tulo ka pilde sa ikaduhang higayon karon nga season.

Sa laing mga duwa, nagpadayon ang pagsidlak sa Phoenix Suns human ilang gipakuratan ang Boston Celtics, 111-103, si LaMarcus Aldridge mipuntos og 20 aron pangulohan ang San Antonio Spurs batok sa Orlando Magic, 129-90, si Ben Simmons mirehistro og 'triple-double' uban ang 13 puntos, 10 ka assists ug 11 ka rebounds sa dihang gilubong sa Philadelphia 76ers ang New York Knicks, 131-109, samtang si Russell Westbrook naka 'triple-double' sab uban ang 19 puntos, 17 ka assists ug 11 ka rebounds sa   Oklahoma City Thunder nga mipakugang sa Sacramento Kings, 132-113.