Leylam FC naghari sa 20th Aboitiz Football Cup

CEBU, Philippines – Gibuntog sa Leylam FC ang Donsacredale, 2-1 sa kulbahinam nilang kampiyonato aron langkaton ang men's open title sa 20th Aboitiz Football Cup niadtong Domingo sa  gabii diha sa Cebu City Sports Center.

Si Kabulo Pinto maoy mipaulbo sa opensiba sa Leylam human siya naka-goal sa nakaon pa lamang nga 19 minutos sa duwa.

Ang Leylam nagpadayon sa ilang pagka-agresibo sa opensa hangtod nga nakabuak sila og lain goal kortesiya ni Marcus Kore sa tunga-tungang bahin sa second half.

Wala pa hinuon hingpit nga giisa sa Donsacredale ang puting bandila gumikan ni Marc Felicilda nga naka-goal sa ika-88 nga minuto sa aksiyon.

Mosuway pa unta pagtabla sa iskor ang Donsacredale, apan nabaraw kini sa kasinatian ug teamwork sa Leylam nga mi-angkon sa ikatulo niining korona sa miaging lima ka tuig sa Aboitiz.

Si Pinto nga maoy gibayaw nga Most Valuable  Player, mao sab ang nakadawat sa Golden Boot award gumikan sa paglansang niini sa labing daghan nga goals sa torneyo nga miabot og 11. Ang iyang teammate nga si Virgilio 'Bebe' Manayon maoy Best Goalkeeper, samtang sila si Christian Dale Paces sa Donsacredale ug Mark Veloso sa Pomeroy maoy Best Defender ug Best Midfielder.

Sa habig ni Donsacredale coach Oliver Colina, dobleng pagmaya ang iyang naangkon gumikan kay siya man sab ang migiya sa Sacred Heart School-Ateneo de Cebu aron makampiyon sa boys 18 division.