Bulldogs giluto sa half baked
CEBU, Philippines — Nadakpan na gyud ang mangtas nga Bulldogs ug giluto kini sa Half Baked, 82-80 sa ligas kaayo nilang duwa sa Sunday.com 5th Conference League 20 niadtong Biyernes diha sa Ibabao-Estancia gym, Dakbayan sa Mandaue.
Bisan pa sa ilang kapildihan, pabilin gihapon nga nag-una sa standing ang Bulldogs nga nagtangag og 4-1 nga baraha.
Bugnaw kaayo ang Half Baked pagsugod sa aksiyon hinungdan nga nabiyaan sila og siyete puntos, 13-20 sa first period. Apan kalit nga misilaob ang ilang opensa inubanan sa solidong depensa aron mailog ang labaw, 38-30 sa halftime. Nagsalimoang ang Bulldogs dihang gipabuthan sila og 23-10 sa Half Baked sa third quarter aron motala sa kinadak-an nilang labaw, 61-40 paingon sa fourth period. Naalarma hinuon ang Half Baked dihang misikit ang Bulldogs ngadto na lang sa dos puntos.
Ang Half Baked mikatkat karon sa ikatulo nga dapit uban sa defending champion Alits nga midaog human ma-forfeit ang 1Med. Ang Half Baked ug Alits nagbitbit og 3-2 win-loss records.
Ang tinuig nga liga nga nahimo pinaagi sa mga paningkamot nilang Tata Nadera ug Atty. Sally Malig-on, gipaluyohan sa VECO, Camilo 'Tata' Nadera, Congressman Jonas C. Cortes, Yamaha DES Strong Cambaro branch nga gidumala ni Alfred Pasana, Marca Leon, Mr. and Mrs. Naig, Wendell Suico ug Alex Malakhooti.
PUNTOS MATAG USA
HALF BAKED (82) – Martel 19, Monte 18, Cortes 15, Guillera 7, A. Cabahug 7, K. Cabahug 6, Doodz 3, Sampang 3, Sanchez 2, Vergacer 2.
BULLDOGS (80) – Apa Jr. 15, Cabahug 14, Gonzaga 12, Bustamante 12, Palabay 7, Mosqueda 6, Cabillo 6, Ygot 5, Abrinica 3.
- Latest
