Huelgas, Adorna daog sa Cebu leg sa NAGT

CEBU, Philippines — Nanghawud ang mga sakop sa national team nga sila si Nikko Huelgas ug Maria Claire Adorna sa tagsa-tagsa nila ka dibisyon sa Cebu leg sa National Age-Group Triathlon (NAGT) Series kagahapon didto sa syudad sa Naga.

Ang 27-anyos nga si Huelgas maoy labing paspas sa men's standard elite human niya gitapos ang 1.5K swim, 40K bike ug 10K run sud sa duha ka oras, dos minutos og kwatro segundos. Gisundan siya ni Kim Remolino sa oras nga 2:05:51, samtang si Jorry Ycong maoy ikatulo sa oras nga 2:05:58.

Sa iyang bahin, si Adorna maoy reyna sa women's elite sa oras nga 2:29:31. Nagsunod ni Adorna sila si Rue Reinhardt Panibon (2:35:38) ug Cianyl Jamae Gonzalez (2:40:09).

Sa junior elite sprint division, ang national athlete nga si Renz Wynn Corbin ug Karen Manayon maoy midaog sa tagsa-tagsa nila ka dibisyon.

Si Corbin mitapos sa lumba sud sa 1:02:38 alang sa men’s junior title gisundan nila ni Godwin Jacob Taylor ug Charles Jeremiah Lipura.

Uban pa nga mananaog mao sila si Justice Sousa (18-24), Nicson Tongco (30-34), Ian Gerard Rusiana  (35-39) , Mark Mulder  (40-44), Clement Covacho  (45-49) and Ruel Binolirao (50-above), Tifanny Blance Quijada (16-29),  Grace Bascon (30-39) ug Zusette Co  (40-49). (BANAT NEWS)