Sharks gilapa sa Crusaders
CEBU, Philippines – Human maka-2-0 sa ilang korte, nahisukamod na sab sa dalan ang Cebu City Sharks sa dihang gilapa sila sa Rizal Crusaders, 57-80 sa Maharlika Pilipinas Basketball League (MPBL) Datu Cup niadtong Lunes sa gabii didto sa Ynares Sports Arena sa Pasig City.
Si Marco Balagtas miratsada og 26 puntos ug 10 ka rebounds alang sa Crusaders nga milusad og kinalit nga ataki pagsugod sa katapusang kuwarter aron ihawon ang Sharks.
Kontrolado na ang duwa bitbit ang 53-42 nga labaw, ang Crusaders misamot pa og kamangtas kay mibugwak kini og nagkayong 14-0 rally nga nakapaburot sa ilang bentaha ngadto na sa 25 puntos, 67-42 hinundan nga nabungog na ang paglangoy sa Sharks sa nahibiling sayes minutos sa aksiyon.
Giwani sa Crusaders ang Sharks sa katapusang kuwarter, 27-15 ug 49-29 kinatibuk-an sa second half hinungdan sa pagkutlo niini og 23 puntos nga demolisyon.
Si Jerome Juanico miamot og 15 puntos ug lima ka assists, samtang si Eric de la Cuesta dunay 12 puntos, pito ka assists ug upat ka rebounds sa Crusaders nga mikulit sa ikalima pa lamang nilang daog sud sa 16 ka duwa.
Si Joel Lee Yu maoy bugtong double-digit scorer uban ang 15 puntos ug upat ka assists sa Sharks nga natagak ngadto sa 6-10. (BANAT NEWS)
- Latest
