Nietes misaad og hait nga bersiyon sa iyang kaugalingon

CEBU, Philippines – Gipasalig ni Pinoy ring star Donnie 'Ahas' Nietes (41-1-5, 23KOs) sa ALA Gym  nga moladlad og mas hait nga bersiyon sa iyang kaugalingon sa  sangka niya batok ni Kazuto Ioka (23-1, 13KOs) sa Japan alang sa bakanteng World Boxing Organization (WBO) super flyweight belt didto sa Macau Tower o dili ba sa Wynn Macau karong Disyembre 31.

Mao kini ang ikaduhang pagsuway ni Nietes nga mamahimong usa ka four-division world champion.

Sa una niyang pangindahay, si Nietes napakyas human  gideklara nga tabla ang away nila sa iyang kababayan nga si Ashton Palicte nga sa tan-aw sa kinabag-an klaro kaayo nga siya maoy daog sa 'Superfly 3' card niadtong Septiyembre  8 didto sa The Forum sa Inglewood, California.

Ang 36-anyos nga si Nietes, nga kanhi naghari sa WBO minimumweight ug light flyweight ug IBF flyweight division, nahatagan og higayon nga moaway  pag-usab sa bakanteng trono batok ni Ioka atol sa 31st WBO Annual Convention sayong ning bulana didto sa Panama.

Sa kasamtangan, ang garbo sa Murcia, Negros Occidental nangandam sa gilantaw niyang lain na sab nga hagit sa mabulukon niyang karera nga naghatag kaniya og pipila ka titulo, apil na ang dungog isip longest reigning Filipino world boxing champion.

Matud pa ni Nietes nga taas kaayo siya og respeto sa 29-anyos nga si Ioka nga sama kaniya usa sab ka three-division champion mao nang doble kayud gyud siya sa ilang training camp.

Nagpanagana hinuon si Nietes pagtagna og knockout gumikan kay alang kaniya maabot ra kini kun mopresentar mismo ang higayon.

Gipasalig ni Nietes nga dili lamang niya buhaton ang tanan kutob sa iyang mahimo kay gusto sab niyang mopakita og bagong bersiyon sa iyang inawayan atubangan sa iyang fans.