CRV mosakmit sa una nilang daog

CEBU, Philippines — Nahuman na ang kalag-kalag, apan ang dinaog-daog nga CRV  padayon gihapon nangita  sa labing una nilang daog sa F. Llamas Youth Association (FYA) Basketball Tournament Season 22 Pastrano's Special Chicharon Cup 2018.

Ang CRV makig-sangka sa Baran Brothers karong adlawa diha sa Atillo gym sa Labangon, Dakbayan sa  Sugbo.

Mag-engkuwentro ang duha sa alas-10:30 sa buntag human sa duwa tali sa Ejay & Ejean Sportswear ug Z&G Pro Audio nga gikatakdang sugdan sa alas-9 sa buntag.

Ang CRV ni Christian Roy Villacastin mao na lang ang usa sa walo ka teams  nga  wala  pa'y daog sa upat niini ka duwa ug paningkamuton nila nga modaog sa Baran Brothers ni Tiny Baran aron maluwas pa sila gikan sa peligrosong sitwasyon.

Ang CRV magsandig nilang Emman Reubal, Kier dela Peña, Boyet Demol ug Marvin Ancla, apan nagkinahanglan sila   og  suporta   sa   ilang kaubanan aron makatagamtam sa una nilang daog.

Dili hinuon basta-basta ang Baran Brothers kay daghan sila'g manirahay sama nilang Zedo Arreglo, Milfred  Sampilo ug Dodee de Gracia. 

Lain sab nga mga tirador sa Baran Brothers mao sila si Derick Tabares, Glenn Reyes ug Isyot Regudo.

Sa laing bahin, ang Z&G Pro Audio mosuway pagpahugot sa ilang kupot sa liderato sa   sangka nila batok sa Ejay & Ejean Sportswear.

Ang    Z&G   Pro  Audio nilang Dave Natividad ug Macky Macachor kasamtangang nag-una sa  standing  uban  ang 3-1 win-loss record, samtang ang Ejay & Ejean ni Noel Medalle adunay 2-1 nga baraha.

Mas nakabentaha sa tapad ang Z&G Pro Audio gumikan kay kompleto sila og mga hinagiban   sama  nila  ni Dexter  Caballero, Dave Caballes,  Rommel Laput, Macky Macachor, Gaboy Aires ug Mervin Manila.

Samtang ang Ejay & Ejean mao lang sila si  Toper Marata, Juviniel Enriquez, Jas Sydiongco, Noel Medalle ug Jason Sabijon.