Titulo tuyo sa UC JRS.

CEBU, Philippines – Korona maoy tirada sa   UC  Junior Webmasters, apan angayan sila nga mangandam sa usa ka dakong gubat sa ilang pakigsangka og usab sa  UV Baby Lancers sa Game 2 sa 'best-of-three' juniors division finals sa 18th Cebu Schools Athletic Foundation, Inc.   karong alas-6 sa gabii diha sa Cebu Coliseum.

Ang UC kinahanglan na lang og usa ka daog  aron sakmiton ang labing una nilang kampiyonato sud sa usa ka dekada human ilang gipakuratan ang UV, 88-84 sa Game 1 niadtong Miyerkules.

Alkansi  og dos puntos, 82-84  sa  katapusang 30 segundos sa aksiyon, si Jasper Pacaña misilyo sa tibuok duwa niyang pagkabayani pinaagi sa paglansang og krusyal nga tres sa wala pa si James Basallo mipasud sa iyang break-away lay-up nga nakapaabante sa UC, 87-84 sa  8.8 segundos na lang sa duwa. Duna pa unta'y tsansa ang UV nga makapuwersa og overtime, apan wala masud ang tres ni Cometa.