Soriano, Tan hahataw sa BVR El Nido leg

MANILA, Philippines — Darayo ang Beach Volleyball Republic On Tour sa pamosong El Nido sa Palawan para sa ikawalong edisyon ng torneo tampok ang mahuhusay na beach volleyball stars sa bansa.

Papalo ang dalawang araw na event sa Sabado sa Lio Beach kung saan walong koponan sa women’s division at men’s class ang magbabakbakan.

Ipaparada ng host Palawan ang dalawang pares mula sa Palawan State University at Lio El Nido.

Magbabalik naman si dating Ateneo de Manila University standout Charo Soriano kasama si Bea Tan bitbit ang pangalan ng Perlas-1. Huling nagtambal sina Soriano at Tan noong Hunyo sa Santa Ana Open.

“I’m back in the game. First time playing beach volleyball again and it feels so good,” ani Soriano na humahawak din sa BanKo Perlas Spikers na naglalaro sa Premier Volleyball League Season 2 Open Conference.

Pinagreynahan nina Soriano at Tan ang Puerto Galera leg noong Enero.

Hahataw din sina Perlas-2 bets Dzi Gervacio at Roma Doromal gayundin sina Air Force 1 duo Mariel Legaspi at Mae Crisostomo, Air Force 2 pair Coyah Abanto at Jen Acain at sina PSU spikers April Sayang at Zarah Javarez.

Lalarga naman sa men’s division sina dating UAAP champion KR Guzman at Ian Yee, Philip Nunez at Mike Abria Air Force, Joshua Barrica at Randy Flores ng Army, Neil Flores at Justin Santos ng Manila Unicorns, Mikhail Shavrak at James Buytrago ng Wildcard, at Janry Corpuz at Allan Aborot ng PSU.

Tumataginting na P50,000 premyo ang paglalabanan sa parehong dibisyon. (CCo)