Dreamscape Lions 11-0 na sa E-Leagues

CEBU, Philippines — Si Ralph Belarmino mipabuto og 40 puntos uban ang 18 ka rebounds sa dihang gilampaso sa Dreamscape Networks Lions ang Tech Mahindra Tech Mighties, 81-62, aron pagpabiling way pilde sa EVO League sa Tanduay Athletics E-Leagues for Basketball Season 14 niadtong Sabado diha sa City Sports Club-Cebu gym.

Mikolekta sab si Belarmino og unom ka steals ug tulo ka assists alang sa Lions nga mi-inat sa perpekto nilang ratsada ngadto sa 11-0 aron tablahon ang record nga nakab-ot sa Supportsave Dragons duha ka tuig ang milabay.

Dako sab og natampo sa Dreamscape mao si Jake Cainday nga dunay 20 puntos, 11 ka rebounds, tulo ka steals ug duha ka assists.

Sa laing duwa sa EVO League, si Matthew Grafilo mibugha og 19 puntos sa dihang gilampornas sa Kyocera Frontiers ang Cognizant Tech Solutions Gladiators, 85-65, alang sa ikalima nilang sagunson nga daog ug ikawalo sa kinatibuk-an sud sa siyam ka duwa.

Sa Elite Classic, si Jaime Pacquiao Jr. mikadlit og 25 puntos, si Antonio Perez midugang og 17 ug si Ildefonso Bulangis dunay 15 puntos alang sa three-time defending champion Converters nga mikastigo sa Tesltra Boomerangs, 114-73, aron pagduyog sa Sykes Pioneers sa ikatulong dapit bitbit ang managsamang 7-4 nga baraha.

Samtang ang ePerformax Reds mipakaging sa Wipro Tigers, 70-64, alang sa ikaupat nilang daog sud sa 11 ka duwa. Si Robert Gilo maoy nangu sa

Reds uban ang 21 puntos, 16 ka rebounds ug tulo ka steals. (BANAT NEWS)