Pads mipasiugda'g tulo ka adlaw nga sports clinic

CEBU, Philippines – Sa tuyo nga makakaplag og daghang talento ug pagtukod og koponan sa Persons With Disability nga moduwa'g sitting volleyball, ang Philippine Accessible Disability Services (PADS), Inc. mipahigayon og tulo ka adlaw nga sports clinic sa volleyball ug sitting volleyball nga gisugdan kagahapon didto sa Aznar Coliseum sa Southwestern University-Phinma.

Ang founder sa PADS nga si John Paul 'JP' Maunes miingon nga moestablisar sila og   programa sa sitting volleyball alang sa PWDs  uban ang katuyoan nga molambo ang mga atleta  nga adunay potensiyal ug pagporma og usa ka team nga mao unya ang morepresentar sa nasud sa nagkalainlaing nasyonal ug internasyonal nga mga kompetisyon.

Ang PADs pinaagi sa U.S. Embassy Sports Diplomacy Program nakigkumboya ni USA volleyball coach ug US Sports Envoy Eric Hodgson sa pagdumala sa free clinic ngadto sa PWDs.

Dili kini ang una ni Hodgson nga nakig-partner sa PADS pinangulohan ni Maunes, kay niadtong 2016, nahilambigit sab siya aron modumala  og usa ka sports clinic sa Mandaue.

Ang tulo ka adlaw nga volleyball ug sitting volleyball dinhi sa Sugbo nalambigit sab og coaching ug seminar workshop ngadto sa PWD participants, faculty ug estudyante.

Alang sa dugang mga kasayoran niining maong programa, mahimong mobisita  sa  PADS   Facebook page o mobisita sa PADS office sa Marina Seaview.