Nayre nanganganib masibak sa YOG

BUENOS AIRES -- Puwersado si table tennis bet Jann Mari Nayre na ta­lunin ang No. 1 player sa under-18 world circuit para buhayin ang kanyang tsansa sa 2018 Youth Olympic Games sa Technopolis dito.

Ito ay matapos magtala ng 1-1 panalo-talo rekord ang 18-anyos na si Nayre.

Unang tinalo ng 18-an­yos na si Nayre ang 16-anyos na si Nicolas Bur­gos ng Chile sa five sets, 11-9, 6-11, 11-9, 11-6, 11-8, sa group stages ng men’s singles preliminaries.

Ngunit nabigo naman si Nayre, ang unang Filipi­no paddler na nakakuha ng tiket sa Youth Olympic Games, kay Maciej Ko­lod­ziejczyk ng Austria, 9-11, 8-11, 1-11, 6-11, sa Group B sa torneong nagtatampok sa pinakamahuhusay na under-18 table netters sa bu­ong mundo.

Kumampanya si Nay­re sa Southeast Asian Games sa Kuala Lumpur no­ong nakaraang taon at sa 18th Asian Games sa Ja­karta, Indonesia.

Susunod na haharpin ni Nayre, estudyante ng San Beda University sa Taytay, Rizal, si 2016 Rio Olympian Kanak Jha ng United States, ang No. 1 paddler sa U18 world circuit.

Maliban kay Nayre, bubuksan din ngayon ni Filipino-Norwegian Christian Tio ang kanyang kampanya sa kiteboarding kasunod sina fencer Lawrence Everett Tan, golfers Yuka Saso at Carl Jano Corpus at Fi­li­pi­no-American swimmer Ni­­cole Oliva.