Melindo misaad

CEBU, Philippines – Masaligon si Milan 'El Metodico' Melindo (36-3, 13KOs) nga mailog niya ang bakus gikan ni Japanese champion Ken Shiro (13-0, 7KOs)  sa ila unyang sangka alang sa WBC light flyweight  title  karong  Oktubre 7 didto sa Yokohama Arena sa Japan.

"He (Shiro) is great tactical fighter pareha nako, pero nagtuo ko nga akong strategy ang molabaw," matud pa ni Melindo atol sa usa ka press conference kagahapon didto sa Summit Circle Cebu Hotel. 

"I already figured him out. I am 100 percent sure of winning."

Si Melindo nagpanikad na nga mobalik og away ibabaw sa ring human mahanaw ang iyang IBF title dihang napilde pinaagi sa 'unanimous decision' batok ni Ryoichi Taguchi sa usa ka unification bout niadtong Disyembre 30 didto sa Japan.

"Importante kaayo ni nga fight sa akong career. I will do whatever it takes," matud pa sa garbo sa Cagayan de Oro City.

Dugang pa ni Melindo pabor siya sa maong away  tungod sa taas niyang kasinatian, samtang si Shiro gamay pa lang og duwa sa iyang karera.

Sa iyang bahin, si ALA chief trainer Edito Villamor misalig sa abilidad ni Melindo nga mopalagpot ni Shiro sa iyang trono.

"We are happy that Shiro chose Milan as his next challenger. He wants Milan because Milan is known in Japan, but he should also be ready because this will be a hard fight for him. Milan is going to Japan with a mission to get that belt,”  matud pa ni Villamor.

Matud pa ni Villamor nga anaa na sa hustong kondisyon iyang batos diin nakahuman na kini og dul-an sa 100 nga sparring rounds.

Nakig-spar usab siya sa mga batan-on ug kusgan nga stablemates sama nila ni Kevin Jake Cataraja ug one-time world title challenger Melvin Jerusalem.