Jaguars mipukan sa warriors

CEBU, Philippines – Ang University of San Jose-Recoletos (USJ-R) Jaguars nagsandig sa eksplosibong salida nilang John Nicole Ubalde ug Ralph Jude Dinolan aron mobangon human malubong og 17 puntos sa first half dayon na ngadto sa pagpukan sa University of San Carlos (USC) Warriors, 101-93 sa 18th Cebu Schools Athletic Foundation, Inc. (CESAFI) men's basketball tournament kagabii diha sa Cebu Coliseum.

Si Ubalde mikadlit og 24 puntos, samtang si Dinolan mipugnit og  21 puntos sa  Jaguars nga mitapos sa unang hugna sa eliminasyon sa ikaduhang puwesto bitbit ang 5-1 nga baraha.

Lain pang tulo ka Jaguars ang miiskor og double figures diin si CESAFI Seniors MVP Jaybie Mantilla mihipos og 19 puntos. Si Juan Miguel Gastador miamot og 18 puntos ug si Elmer Echavez midonar og 15 puntos sa Jaguars  nga nakabangon human malubong, 25-42 sa nahibiling 4:15 sa ikaduhang kuwarter.

Katapusang naglabaw ang Warriors sa iskor nga 66-70 gumikan kay si Ubalde miduslit og walo ka sagunson nga puntos sud lamang sa 48 segundos sa wala pa si Gastador mipasud sa iyang lay-up nga maoy nakapalabaw sa hingpit sa Jaguars, 76-70 paingon sa fourth period.