Team Tanke mi-'walkout' atol sa Talisay City Mayor's Cup

CEBU, Philippines – Usa ka protesta nga gipaagi sa usa ka 'walkout' ang gihimo sa koponan sa Barangay Tanke atol sa Talisay City Mayor's Cup Inter-barangay basketball tournament kagahapon didto sa Talisay City Sports Complex.

Rasun sa maong kagubot mao ang isyu sa residency ug qualification sa mga players sa Tanke nga wala gidawat sa mga committee sa maong liga.

Gawas nga namauli, ang mga fans usab sa team isug nga miuyog sa gate sa TCSC nga miresulta sa pagkaguba niini. Si Barangay Councilor Randy Gavas wa kauyon sa desisyon sa committee sa liga nga iyang gihulagway nga dili makiangayon.

“Ilang players iparehistro sa ilaha, wala gi-apply ang residence ug proof of billing, karon nga anaa na narehistro sa Tanke, ila na ilisan ang rules," matud pa ni Gavas.

Sa iyang bahin, si Talisay City Sports Commissioner Jeanneth Villagonzalo mipasabot nga ila nang gi-set ang mga balaodnun ug patakaran sa duwa alang sa mga koponan ug apil na niini ang proof of residency sa mga players.