Che’Lu vs. Go for Gold para sa Finals
Laro Bukas(Ynares Sports Arena, Pasig City)
5 p.m. Go For Gold vs Che’Lu (Game 1, Finals)
MANILA, Philippines — Inilabas ng Che’Lu Bar and Grill ang buong lakas patungo sa 86-73 panalo laban sa Centro Escolar University para hablutin ang huling tiket sa finals ng 2018 PBA D-League Foundation Cup kagabi sa Ynares Sports Arena sa Pasig City.
Sumagot sa hamon si Jeff Viernes nang magpasabog ng 26 puntos tampok ang apat na three-pointers kalakip ang 6 rebounds, 6 assists at 3 blocks para tapusin ng Revellers ang kanilang best-of-three semis series ng Scorpions sa 2-1.
Nakauna ang Revellers nang itarak ang 112-97 panalo sa Game One bago nakaresbak ang Scorpions sa Game Two bunsod ng 83-78 desisyon.
Nakasama ni Viernes sa pagbuwelta si Jessie James Collado na humataw ng double-double na 19 markers at 12 boards gayundin si Levi Hernandez na tumipa naman ng 12 points.
Pare-parehong may 11 puntos sina Orlan Wamar, John Roxas at Judel Fuentes para sa Scorpions.
Makakasagupa ng Revellers ang Go For Gold sa best-of-five championship showdown.
Nakapasok sa finals ang Scratchers matapos walisin ang Marinerong Pilipino, 2-0, sa hiwalay na best-of-three semis series.
Namayani ang Go For Gold sa Game One (96-87) at Game Two (103-75).
Lalarga ang Game One bukas sa parehong venue.
- Latest
