99ers kampiyon sa Division 2 sa USC-NABC

CEBU, Philippines — Si Joseph Chu Bragat miiskor og 19 sa iyang 31 puntos sa first half ug si Fritz Villamor mitimbre og 24 puntos sa dihang ang 99ers misilhig sa 1997 Ronins sa ilang 'best-of-three' finals series bugti sa 87-76 nga kadaogan  sa  Game  2 aron pagsakmit sa kampiyonato sa Division 2 sa University of San Carlos-North Alumni Basketball Conference (USC-NABC) Summer League 3 niadtong Domingo diha sa USC-North Campus gymnasium.

Gihuman sa 99ers ang upat ka bulan nga torneyo nga walay pilde sa 12 ka duwa timaan sa ilang dominasyon.

Si Bragat miiskor og 10 sa unang kuwarter ug dayon midugang og nuybe puntos sa sunod nga bahin sa duwa aron pagduso sa 99ers ngadto sa 45-37 nga labaw sa halftime,

Misalida sab dayon si Villamor pinaagi sa pagbugha og 11 puntos sa ikatulong kuwarter nga maoy nakapadasig sa 99ers taliwala sa gihimong pagresbak sa Ronins. Si Villamor maoy gikoronahang Division 2 MVP.

Wala sab magpa-alkansi ang Ronins ug gani nakamaneho pa sila paglabaw og usa ka lugas sa sayong bahin sa katapusang kuwarter, apan si Bragat nanginit og balik aron pagkadlit og dugang 10 puntos, samtang si Vito Perez mitali og otso sa iyang 10 puntos sa krusyal nga bahin sa duwa nga maoy nakasanta sa tinguha sa Ronins nga makabangon.

Ang team captain nga si Christopher Osorio mikuha sab og atensiyon sa 99ers human mikolekta og 15 puntos.

Si Osorio usa sa upat ka 99ers nga kanhi nakaduwa sa USC Baby Warriors sa Cebu Amateur Athletic Association (CAAA) nga nailhan na karon nga Cebu Schools Athletic Foundation, Inc. (CESAFI). Ang uban mao sila si Bragat, Villamor ug Jess Kharlo Miñoza  nga miamot og nuybe puntos.

Ang uban pang miyembro sa 99ers mao sila si Homer Vargas, Ernest Rama, Michael Alcarde, Mark Capili, Ark Lloyd Egot, Ralph Ligtas, Mark Loyola, Paul Magadan, Malazarte Marquez, Michael Ogdoc, Allain Ortiz ug Matt Zanoria.

Si Al Bughao maoy nangu sa Ronins uban ang 25 puntos, samtang sila  si  Christian Tapic ug Jake Saturinas nagkumboya'g 27 puntos sa pilderong koponan. (BANAT NEWS)