Finals Berth paglalabanan ng Scorpions at Revellers

MANILA, Philippines — Pag-aagawan ng Cen­tro Escolar University at Che’Lu Bar and Grill ang huling tiket sa finals sa pag­larga ng 2018 PBA D-League Foundation Cup ‘do-or-die’ semis game nga­yong hapon sa Ynares Sports Arena sa Pasig City.

Asahan ang matinding bakbakan sa pagitan ng Scorpions at Revellers sa alas-5.

Pinataob ng Revellers ang Scorpions sa iskor na 112-97 sa Game One ngu­nit nakabawi ang CEU nang itarak ang 83-78 desisyon kontra Che’Lu sa Game Two noong nakaraang linggo para maipuwer­sa ang rubber match.

Nakakuha ng malakas na puwersa ang Scorpions mula kina Rich Guinitaran at Orlan Wamar para dalhin ang kanilang tropa sa pa­nalo.

Kaya’t inaasahang mu­ling ilalabas ng dalawang mahuhusay na manlalaro ang bangis upang pamu­nuan ang Scorpions sa pag­martsa sa finals.

“We manned up and that’s what we’re telling them. The playoff is a man’s game and that’s what we need to do. We have to stand our ground and take what they can give. We have to fight,” wika ni Scor­pions mentor Derrick Pu­maren.

Tiwala naman si Che’Lu head coach Stevenson Tiu na nananatiling mataas ang moral ng kanyang mga ba­taan.

Mas determinado at mas uhaw na Revellers ang hahataw sa ‘do-or-die’ game sa pangunguna ni Jeff Viernes.

Maliban kay Viernes, nais ni Tiu na makakuha ng malaking kontribusyon mu­la sa iba pang miyembro ng koponan partikular na ki­na Levi Hernandez, Chris Bitoon at Jesse Collado.

“This is not Jeff Viernes’ team alone. This is Che’Lu and all must contribute,” wika ni Tiu.

Ang magwawagi sa Scor­pions at Revellers ang haharap sa Go For Gold sa best-of-five championship showdown.

Nauna nang umusad sa finals ang Scratchers matapos walisin ang Marinerong Pilipino, 2-0, sa hi­walay na best-of-three se­mis series.