Chichay's chicharon gisubha'g daog
CEBU, Philippines — Nidaog dayon ang Chichay's Chicharon sa ilang unang duwa pinaagi sa paglubong sa Lucky Lee, 80-57 sa 4th San Agustine Cup Basketball Tournament 2018 niadtong Biyernes didto sa Simborio basketball court sa Tayud, Lilo-an.
Kumbati pa ang duwa sa first period diin labaw lang og usa ka lugas ang Lucky Lee human sa maong kuwarter,15-14. Dali hinuon nga nakarekober ang Chichay's Chicharon ug hinayhinay nga miinat sa labaw sa ikaduhang kuwarter sa pagpangulo ni Jun Rayan Pepito ug wala na sila molingi pa sukad niadto.
Si Terio Mendoza maoy nangulo sa scoring sa Chichay's Chicharon ni Wendy Quiapo nga mikandos og 18 puntos, lakip na ang upat ka sunod-sunod nga 3-point shots sa fourth quarter nga nakainat og maayo sa ilang labaw. Sila si Pepito, Joey Sayta ug Johnrey Caparroso nagtampohay og 10 puntos sa Chichay's Chicharon.
Sa pasiunang duwa, yano sab kaayo nga midaog ang Sniper ni Merlou Mercader dihang ilang gilubong ang Wahl Inc., 74-63 ubos sa pagpangulo sa mga beterano niini nga silang Marth Iwayan, Niño Servande ug Alfie Pilapil.
Ang liga nga nahimo pinaagi sa paningkamot sa presidente niining si Arnel 'Cdu' Pepito, gipadagan ni commissioner Ondo Muñez sa abag nilang Choy Pilapil ug Joe Velez. Suportado sab kini ni Kagawad Cedie Cabahug ug mga konsehal nga silang Alfie Pepito Ricky Frias ug Gedion Cuyos.
PUNTOS MATAG USA
Unang duwa:
SNIPER (74) – Menchavez 15, A. Pilapil 12, Serbande 11, Judaya 11, Iwayan 10, Icot 6, Ronel 4, Roland 3, Mercader 2.
WAHL INC. (63) – Noynay 27, Retiza 18, Ramil 5, Maranga 4, Ybañez 2, Abraham 2, Jaime 2.
Ikaduhang duwa:
CHICHAY'S (80) –
Mendoza 18, RJ Pepito 10, Sayta 10, Caparoso 10, Cdu Pepito 8, Cortes 8, Arocha 7, Nogas 4, Bai Bogs 4.
LUCKY LEE (57) –
Junix 18, Veloy 15, Nike 9, Jake 4, Dave 3, Michael 3, Tyler 3.
- Latest
