Hinunangan bay run, balik baroto regatta nagmalampuson

CEBU, Philippines – Ang duha ka makasaysayanong kalihukan sa paugnat sa kusog – ang   Hinunangan Bay Run ug Balik Baroto Regatta nga gipahigayon aron pagdugang og lamas sa ika-165 nga founding anniversary sa Hinunangan dili pa lang dugay nagmalampuson ug giplanohan kining himuon nga tinuig nga aktibidadis sa maong mauswagong lungsod sa Southern Leyte.

Gatosan ka mga long distance runners gikan sa nagkadaiyang dapit sa nasud, apil na ang mga tang-an nga managanay sa Sugbo ug Davao ang misalmot sa makutas nga marathon nga niagi sa matahom nga talan-awon sa Hinunangan Bay, samtang bagang panon sa mga pobreng mananagat luwan sa maanindot nilang baroto nga dunay layag ang miwadwad sa ilang abilidad sa pagbugsay sa 'Balik Baroto Regatta'.

Ang mga opisyal sa lokal nga kagamhanan sa Southern Leyte walay kasudlan sa ilang kalipay gumikan kay ang kaluhang kalihukan nakasilbe man sa ilang tumong, dili lamang sa paghimo og kasikas sa sports sa ilang tourism, apan sa pag-promote sab sa mabulukon nga kasaysayan ug kultural sa Hinunangan.

"I am happy that the present leaders of Hinunangan led by Mayor Reynaldo Fernandez have initiated a week-long activities that our town has made an important place in world history when the American forces made the largest amphibious landing in our shore at Hinunangan Bay during the Battle of Leyte Gulf in 1944," matud pa ni Kongresista Roger 'Oging' Mercado, ang representante sa bugtong congressional district sa Southern Leyte.

Sila si Mercado ug Hinunangan Mayor Reynaldo 'Sonny' Fernandez parehong midalit sa mainiton nilang pahalipay ug pasalamat ngadto ni kanhi customs district collector ug regional director sa Ministry of Youth and Sports Development David 'Kuya Boy' Odilao Jr.  nga maoy  utok sa maong duha ka mahinungdanong kalihukan.

"For the first time, we have organized the Hinunangan Run and Balik Baroto Regatta in the historic Hinunangan Bay," sumala pa ni Mayor Fernandez. "I would like to give special thanks to Kuya Boy (Odilao) for sharing his talent, time and treasure."

Gani si Philippine Sports Commissioner Ramon Fernandez nagkanayon nga ilang ikonsidera ang 'baroto regatta' isip usa sa mga sports event nga i-promote sa PSC.

Sa iyang bahin, si Odilao, ang giyukboan nga amahan sa Sinulog ug Bahug-Bahug sa Mactan mapasigarbuhon nga sa maong mga kalihukan ilang napakita ang kanindot ug natural nga mga talan-awon sa yuta niyang natawhan.

"If fully developed, our town and province will be transformed into an 'eco-tourism tiger' in the area," matud pa ni Odilao.

"Just like the Sinulog, Battle of Mactan, Regatta de  amboanga, Subiran Regatta of Tacloban, Marajao-Karajao in Surigao, among others, we are optimistic that the Hinunangan Bay Run  and  Balik  Baroto Regatta   will     become a national and international festivity."