Parker Hornet na gyud

CEBU, Philippines – Opisyal na nga sakop sa Charlotte Hornets ang four-time NBA champion nga si Tony Parker. Mitapon siya sa Eastern Conference team human sa 17 ka season sa San Antonio Spurs.

Segun sa taho sa pipila ka US media, ang French point guard miuyon ngadto sa duha ka tuig nga kontrata sa Hornets nga mibalor og $10 million.

"We are thrilled to add a player of Tony's caliber and experience to our roster," matud pa ni Hornets GM Mitch Kupchak.

"We believe his track record of success and playoff resume will add backcourt depth to our roster and veteran leadership to our group".

Ang maong lakang naghiusa og balik sa 36- anyos nga si Parker uban ni coach James Borrego, ang assistant coach sa Spurs sa kinatibuk-ang bahin sa karera ni Parker.

Ubos sa Hornets, iya sab makauban ang kababayan niyang si Nicolas Batum.

Sukad siya gikuha nga No. 28 pick niadtong 2001 NBA Draft sa Spurs, si Parker maayo og labok ug nahimong lider sa San Antonio diin siya mi-average og 15.8 points, 5.7 assists ug 2.8 rebounds matag duwa sud sa 1.198 ka regular-season games.

Iyang gitabangan ang Spurs paghakot og upat ka titulo sa NBA niadtong tuig 2003, 2005, 2007 ug 2014.

Ang six-time All-Star maoy gipasidunggan nga NBA Finals MVP niadtong 2007.